Të rinjtë e Bashkisë së Durrësit kanë tashmë në dispozicion një hapësirë multifunksionale ku mund të mblidhen, bashkëbisedojnë dhe zhvillojnë aktivitete edukative, sociale dhe kulturore.
Përurimi i Qendrës Rinore Multifunksionale bëri bashkë Kryetaren e Bashkisë së Durrësit, Znj. Emiriana Sako , Ministrin e Shtetit për Rininë dhe Fëmijët, Znj. Bora Muzhaqi, Drejtorin Ekzekutiv të World Vision Albania, Znj. Eljona Elmazi, Drejtorin e Përgjithshëm të AKR-së, Z. Geron Ibrahimi, si dhe dhjetëra të rinj nga Këshilli Vendor Rinor dhe Grupet Impakt të World Vision Albania.
Kjo Qendër ka si qëllim përmirësimin e infrastrukturës rinore nëpërmjet shtimit të ambienteve për lexim (bibliotekë) dhe për zhvillimin e aktiviteve rinore me karakter edukativ, kulturor apo social të komunitetit rinor të Bashkisë Durrës, duke nxitur njëkohësisht edhe ndjenjën e vullnetarizmit tek të rinjtë.
Qendra do të jetë një mënyrë e mirë për zhvillimin e aftësive komunikuese, planifikuese, bashkëpunuese, kërkimore dhe analitike, gjithashtu si një hapësirë e dedikuar për programe dhe aktivitete ku të rinjtë janë përfitues direkt, një hapësirë miqësore informimi dhe nxitëse për të qenë aktivë në proçese vendimmarrëse.
Qendra është financuar nga Agjencia Kombëtare e Rinisë dhe Bashkia Durrës, dhe do të menaxhohet nga World Vision Albania në partneritet me bashkinë.
