Marsela Çibukaj, ambasadore e World Vision Albania

Një tjetër personazh i njohur i bashkohet World Vision në Shqipëri në kauzat në mbështetje të fëmijëve, të rinjve dhe familjeve më në nevojë.

Artistja e talentuar dhe shumë e dashur për publikun, por edhe e ndjeshme dhe aktive ndaj kauzave sociale, Marsela Çibukaj do të jetë ambasadore e World Vision Albania, si zëri i dhjetëra mijëra fëmijëve dhe të rinjve në Shqipëri.

Pas firmosjes së memorandumit të bashkëpunimit me Drejtoreshën ekzekutive të World Vision Albania, Eljona Elmazi, ambasadorja e re zhvilloi edhe një takim të ngrohtë me disa nga të rinjtë e grupeve IMPACT.

Gjatë bashkëbisedimit, Marsela Çibukaj i inkurajoi të rinjtë që punojnë fort për të zhvilluar talentet e tyre dhe për të qenë agjentë ndryshimi në komunitet, ndërsa i ftoi që ta ndërtojnë të ardhmen në Shqipëri.

“Unë vetë kam zgjedhur të rikthehem nga Italia në Shqipëri për ta ndërtuar jetën. Mund të hasni në vështirësi, por gjithmonë ka një zë që të therret për të dhënë kontribut në tokën e të parëve,"- tha Çibukaj.

Bashkëpunimi i World Vision Albania me Marsela Çibukaj ka nisur që në dhjetor të 2022, ku këngëtarja iu bashkua eventit “Dressed in white”, një mbrëmje bamirësie që synonte të ngrinte fonde në mbështetje të vajzave dhe grave të dhunuara.

Bashkë me ambasadorët e tjerë Luiza Gega, Nik Xhelilaj, Alban Skënderaj dhe Arlinda Çausholli, Marsela Çibukaj do të bashkëpunojë vullnetarisht me World Vision Albania për të sjellë ndryshim të qëndrueshëm për fëmijët dhe familjet në Shqipëri.