Tiranë – 29 të rinj të grupeve IMPACT të World Vision Albania, të shoqëruar nga drejtori ekzekutiv Eljona Elmazi, zhvilluan këtë javë një takim me ambasadorin e Bashkimit Evropian në Shqipëri, Z. Silvio Gonzato.
Në një bisedë të lirshme, të hapur dhe të vërtetë, të rinjtë e programeve të World Vision Albania diskutuan me ambasadorin për një cështje bashkëkohore dhe me rëndësi kritike, siç është ndryshimi i klimës dhe mjedisi.
Biseda u përqendrua tek Kapitulli i 27 i BE-së “Mjedisi dhe Ndryshimet Klimatike” dhe roli kritik që luajnë të rinjtë në adresimin e çështjeve mjedisore. Aktivistët e rinj të World Vision, të cilët vinin nga qytete të ndryshme të Shqipërisë, rrëfyen në mënyrë të shkëlqyer përfshirjen e tyre në grupet IMPACT, ku folën për disa nga projektet e tyre me ndikim të prekshëm në shoqëri – nga rivendosja e gjelbërimit në liqenin e Paskuqanit te organizimi i kampeve verore të fokusuara tek problematika e klimës – iniciativa këto që tregojnë përkushtimin e këtyre liderëve të rinj për të krijuar ndryshime të qëndrueshme.
“Bashkë me të rinj të tjerë dhe me mbështetjen e World Vision Albania kemi ndërrmarrë disa nisma në komunitetet, si aksione pastrimi, aktivitete ndërgjegjësuese, por edhe nisma për mbjellje pemësh. Histori suksesi do të quaja gjelbërimin e hapësirave përreth Liqenit të Paskuqanit ku kemi mbjellë rreth 1 000 pemë, duke e kthyer atë në një zonë rekreative,” – tha Ledjona.
Të rinjtë u inkurajuan, u mbështetën dhe u përgëzuan disa herë nga ambasadori për angazhimin e tyre dhe për kurajon për të kontribuar në komunitetin dhe kauzat e tyre. Ai i inkurajoi veçanërisht duke u thënë se “ajo që ata po bëjnë është që po ndihmojnë njerëzit dhe vendin të përgatitet për hyrjen në BE”.
“E ardhmja e Shqipërisë është brenda BE-së dhe vetëm duke punuar së bashku, mund të mbrojmë mjedisin dhe klimën e përbashkët. Tranzicioni i gjelbër i Shqipërisë është çelësi për përmbushjen e standardeve mjedisore të BE-së dhe për të na sjellë më pranë qëllimeve tona të përbashkëta Ajo që po bëni aktualisht ju është pikërisht ajo që duhet të bëjë çdo qytetar evropian. Me nismat që ju po ndërmerrni, po përgatisni komunitetet tuaja për të qenë pjesë e BE-së. Është një prej bisedave më brilante që kam zhvilluar dhe modeli impakt është jashtëzakonisht shpresëdhënës,” – u shpreh ambasadori, u cili theksoi interesin e tij për të parë nga afër nismat që të rinjtë ndërmarrin në komunitetet e tyre.
Gjatë fjalës së tij, Z. Gonzato i njohu të rinjtë edhe me progresin e bërë nga Shqipëria për procesin e integrimit evropian, ndërsa foli në mënyrë konkrete për ndihmën që jep BE-ja në mbrojtjen e mjedisit në Shqipëri.
Të rinjtë pjesëmarrës në takim janë pjesë e një rrjeti prej 1335 të rinjsh të World Vision Albania, të cilët në mënyrë të vazhdueshme angazhohen në adresimin e problematikave që i shqetësojnë në komunitetet ku ata jetojnë.
