Shërbime të specializuara për Sofielën, largësia nuk është më një problem

Sofiela nga Prrenjasi ka një lidhje të fortë me Mimozën, psikologën që çdo javë udhëton drejt shtëpisë së vogëlushes për t’i ofruar asaj terapi zhvillimi.

10- vjeçarja me aftësi të kufizuara merr çdo javë shërbim të specializuar në shtëpi dhe është një prej fëmijëve përfitues të projektit “Qendër Komunitare për shërbime ndaj aftësisë së kufizuar”.

Projekti i financuar nga Bashkimi Evropian dhe që zbatohet nga World Vision Albania dhe Bashkia Prrenjas-Faqja Zyrtare do t’ju vijë në ndihmë 180 fëmijëve/të rinjve me aftësi të kufizuara.

Së shpejti, Sofiela do të ketë mundësi të marrë shërbime të specializuara edhe në ambientet e Qendrës Komunitare në qytetin e Prrenjasit, e cila do të vihet në funksion brenda pak ditësh.

"Sofiela është shumë e dashur. Ajo ka qenë edhe pjesë e shërbimit lëvizës prej 3 vitesh dhe ka bërë shumë progres. Ajo arrin të formojë pazëll të thjesht, ngjyros brenda kontureve sipas modelit të dhënë, inicion një lojë, njeh dhe identifikon kafshët e fermës," - shprehet psikologe Mimoza.

Çdo fëmijë me aftësi të kufizuara ka të drejtë të ketë akses në shërbime cilësore, të cilat i ndihmojnë ata të zhvillohen, të arsimohen dhe të jetojnë jetën në plotësi.